"Rîtest du nu hinnen,
der aller liebste man,
der beste in mînen sinnen
für al deich ie gewan.
Kumest du mir niht schiere, sô vliuse ich mînen lîp:
den möchte in al der welte
got niemer mir vergelten,"
sprach daz minneclîche wîp.

"Wol dir geselle guote
deich ie bî dir gelac;
du wonest mir in dem muote
die naht und ouch den tac.
Du zierest mîne sinne, und bist mir dar zuo holt:
(nu merke et wiech daz meine)
als edelez gesteine
swâ man daz leit in daz golt."